Papa ra ntima ri funengete ndyangu hinkwawo wa vunanga bya Hip Hop etikweni ra Afrika Dzonga na le tikweni-nkulu ra Afrika hi ku angarhela. Rifu ra HHP, Jabba, Jabulani Tsambo, ri tise gome na na mbitsi eka varhandzi, valandzeri, vaseketeri, vanghana, maxaka na va ndyangu wa yena.
HHP a ku ri munhu wo nyikiwa ngopfu eka mhaka yo tirhisa rito ra yena, a tlhe a va nkwema ya ririmi (word smith). Tsambo u teke vito ra yena a ri gandla eka nxaxameto wa tinhenha hi nyiko ya yena ya vuyimbeleri. Tinsimu to fana na Harambe, O Mang? Bosso ke Mang? Music & Lights, Poverty na Sunglen ti yimise tiko hi milenge. HHP u tekiwa tani hi byongo bya yinhla tlhelo phuphula-nkulu (pioneer) eka vuyimbeleri lebyi byi vuriwaka Motswako.
Nxanxameto wa vuhumeso bya Hiphop Pantsula:
Introduction (2000)
Maf Town (2001)
O Mang? (2003)
YBA 2 NW (2005)
Acceptance Speech (2007)
Dumela (2009)
Motswafrika (2011)
Motswako High School (2014)
Tani hi xiyimbeleri lexi a xi tiva ngopfu nkoka wa ku va munhu a titiva ku hi yena mani, a tiva matimu ya kwe, HHP u nghenelele na magoza mo hunguta kumbe ku herisa moya wa rivengo na xihlawu-hlawu exikarhi ka rixaka ra Vantima. HHP a ku ri munhu loyi a a tinyungubyisa ngopfu hi timintsu ta yena, a kuri munhu wo a nga chavi ku vulavula hi timintsu ta yena hi ku kongomisa ka kokwa wa yena Tsambo, loyi a nga suka eMozambique a ya tirha no tshama le Mmabatho.
Eka vunanga bya yena u xiximiwe ko tala hi masagwadi;
SATMA Lifetime achievement Award 2017
2008 SAMA ya Male Artist of the Year
2009 MAMA ya Video of the Year (Mpitse)
2010 a ri muyimela-ku-langhwa wa BET Award for Best International Act
Tsambo u nganakani
u nkwema
u tsambile la u nga tsamba kona
ku nge he tsambi munhu.
Ntimu (soul) wu ku rhumeke
wu ku amukele hi vurhonga.
