MUST WATCH: DJ Brian Rikhotso interviews the last living female Tsonga pioneer of Mindzhumba, Mhani Madya ku Bomba

Hi Hukuri (7, 2018), DJ Brian Rikhotso u endli matimu ya nkoka hi ku kandziyisa mbhurisano wo enta na Hulukati yo hetelela ya vunanga bya Xitsonga, Mhani Madya ku Bomba. Eka lavantshwa, Mhani Madya ku Bomba i OG, vona na Mhani Khatisa Chavalala hi vo timitsu ta vunanga bya Xitsonga byo kandziyisiwa hi vavasati. Va ri vambirhi i tiphuphula-nkulu (pioneers) ta vunanga bya Mindzhumba. Namuntlha Mindzhumba ya tiveka hi tinsini to fana na Benny Mayengani, Prince Rhangani na Joe Shirimani na van’wani. Mhani Khatisa Chavalala na Mhani Madya ku Bomba hi vo va nga boxa ndlela ku namuntlha hi va na tinsini ta vaxisati to tiyimela hi toxe tani hi Sunglen Chabalala, Conny Chauke na van’wani.

Xo hlomula mbilu hi lexi… Mhani Madya ku Bomba va hava digital footprint, swi nga leswi matimu ya vona na tinsimu ta vona ku hava eka vuhlanganisi (internet). Kambe hi ku rhandza ka Umbe (Xikwembu), Barhule va ve va hi tsemekela nhlana va hundzula xiyimo lexi, swi nga leswi, ku na nkandziyiso wa xivonwa xa Mhani Madya ku Bomba xa 48:36 minutes eka YouTube; 

Hi leswi swi swa khume hi nga swi dyondza hi Hosikati ya makumu ya Mindzhumba eka nongonoko wa Dzumba na Mina na DJ Brian Rikhotso eka xiphemu xa Hi Dzumba na vakhale;

#1 Mhani Madya ku Bomba va ve kona emisaveni hi n’wheti ya Hukuri (19, 1944) eka Makhuva, i n’wana Robson Mbedlha Mathevula Xinghema na N’waBasopa Josephina Mhlava. A va ri nhungu vana va Xinghema na ku nga se lova vanhwana vambirhi, a ri na majaha ya ntlhanu na vanhwana va nharu.  

#2 Mhani Madya ku Bomba va thwasi vun’anga va nge se fikisa na malembe ya khume, ve loko va pfukiwa hi mikwembu a va ri na nhungu wa malembe. Ve tihlolo hi to ti va hanyisaku, vuyimbeleri a byi se tshama byi va endlela mali, va endlisiwa hi rirhandzu.

#3 Mhani Madya ku Bomba ve vona na Mhani Khatisa Chavalala a va kota ngopfu loko va ha hanya, a kuri vanhu vo endzelana swinene. Mhani Khatisa Chavala va vi na nkucetelo wukulu eka mayimbelelo ya Mhani Madya ku Bomba, ve loko va sungula a va yimbelela ku fana na Mhani Khatisa, hi leswi a va va rhandzisa xiswona. 

#4 Mhani Madya ku Bomba va sumi ‘N’wana wa Tuva‘ endhaku ka loko ndisana ya vona Mamayila, a ta va a tisungini hi mbitsi yo tlimbeletiwa ku va evukatini.

#5 Mhani Madya ku Bomba va na makume-nharhu-na-nhungu wa malembe na va kha va chayela movha, va sungule ku chayela hi  lembe ra 1980 hi bakkie.

#6 Mhani Madya ku Bomba I mhana Brian Bomba, loyi a tiviwaku hi risimu ra Yellow bone. DJ Brian Rikhotso u tiyisisi ku yin’wani ya minsumo ya risimu ra Yellow Bone yi sumiwi hi vona. Mhani Madya ku Bomba na Brian Bomba hi vo Mhani na n’wana va ri voxe va nga na sagwadi ra Xitsonga Music Award ya Munghana Lonene FM.  

#7 Vuhumeso (album) bya vona bya madyondza a byi thyiwe Madya ku bomba, hi byo byi nga hi nyika risimu ra ndhuma ra N’waXikukwani leri ri nga kandziyisiwe eka JJ Khazamula, Jonas Mkhavela a ba katara ivi Girly n’wana John Mayengani a yimbelela tlhelo ka Mhani Madya ku Bomba. N’waXikukwani yi vuye yi dumisiwa nakambe hi lembe ra 2012 hi DJ Vetkuk vs Mahoota va ri na Candy Tsa MaNdebele / Candy N’waYingwani eka vuhumeso bya Dinaledi, kambe ku fika na namuntlha a va se tshama va nyika Mhani Madya ku Bomba na peni.

#8 Mhani Madya ku Bomba va ndzuviwi hi sagwadi ra Lifetime Achievement eka Xitsonga Music Awards ta Munghana Lonene FM. 

#9 Mhani Madya ku Bomba va tirhi na tinhena to fana na David Mlwela, John Mayengani, Abel Mkhari, Nozinja, na Joe Shirimani. Ve Nozinja u ze a va longisa mapa va kha va kongoma eFrance ku ya nyanyula genge ya valungu. 

#10 Mhani Madya ku Bomba va tshembisa ku vuya eka vunanga, ve va lava ku tirha na Joe Shirimani nakambe. 

Whe Madya ku Bomba wa Mbedlha wa Xikhuwani wa Xinghema wa Makhuwa, hi nge pfuki hi ku rivale. Hi khensa hinkwaswo u nga hi endlela swona hina varhandzi va vunanga bya Xitsonga. 

Swifaniso: DJ Brian Rikhotso / Facebook